DAGUPAN CITY, Pangasinan — Naglunsad ng manhunt operation ang mga awtoridad laban sa isang Nigerian na nagnakaw sa isang medical student, dakong 3:30 ng umaga sa harap ng isang convenience store sa Arellano St., Brgy Pantal.
Ayon sa ulat mula sa tanggapan ni Police Lt. Col. Ferdinand “Bingo” de Asis, Pangasinan Police Provincial Office deputy provincial director for operations, nabatid na bandang 3:30 ng madaling araw, Biyernes, Agosto 5, ang biktimang si Baribolo Vurasi Ndor, 33, Nigerian at medical student, tubong Rivers State, Nigeria at naninirahan sa Cuison Cmpd., Amado St., Tapuac Dist,. Dagupan City, ay ninakawan umano ng suspek na si Emmanuel Divine Victoria Ugochukwa, 37, kasalukuyang naninirahan sa Apt 116, Brgy Mamalao, San Carlos City.
Isinalaysay ng biktima sa Dagupan City Police na dakong 3:30 AM habang pauwi siya nang makasalubong niya ang nasabing suspek at dalawa pang Nigerian na nag-iinuman sa harap ng 7/11 convenience store.
Habang nakikipag-usap ang biktima sa suspek, kinuha nito ang kaniyang SAMSUNG A8 cellular phone na nagkakahalaga ng P17,000.
Hindi pa nakuntento, inimbitahan ng suspek ang biktima sa kabilang kalsada.
Pinalo umano ni Ugochukwa ang biktima ng bote ng beer sa ulo at kinuha ang cash nito sa wallet na aabot sa P36,000.
Inihahanda na ang kaukulang reklamo laban sa suspek para sa referral sa City Prosecutor’s Office, ayon sa PNP.